Тошкент, Ўзбекистон (UzDaily.uz) — Ўзбекистон Республикаси Инвестициялар, саноат ва савдо вазирлигида Юта штати (АҚШ) делегацияси билан учрашув бўлиб ўтди, унда сармоявий, савдо-иқтисодий ва молиявий ҳамкорликни мустаҳкамлашга оид кенг кўламли масалалар муҳокама қилинди.

Томонлар муҳим фойдали қазилмаларни қазиб олиш ва қайта ишлаш, ахборот технологияларини ривожлантириш, таълим дастурлари, металлургия саноати, қишлоқ хўжалиги, транспорт-логистика инфратузилмаси каби қатор устувор йўналишларда қўшма лойиҳаларни амалга ошириш истиқболларини кўриб чиқдилар.

Алоҳида эътибор Ўзбекистоннинг саноат салоҳияти ва Юта штатининг технологик имкониятлари ўртасида умумий тил топишга, шунингдек, минтақалараро алоқаларни мустаҳкамлаш ва икки томон ишбилармон доиралари ўртасида тўғридан-тўғри алоқаларни ўрнатишга кўмаклашишга қаратилди.

Учрашув якунида муҳокама қилинган барча соҳаларда барқарор ривожланиш ва технологик шерикликка урғу берилган ҳолда икки томонлама ҳамкорликни янада кенгайтириш ва чуқурлаштиришдан ўзаро манфаатдорлик билдирилди.